對僑胞發言 葉劉堅持用普通話

【明報專訊】新民黨主席葉劉淑儀噚日去咗「香港緬華互助會」舉辦嘅政改論壇，葉太好貼心地用普通話發言，確保一眾僑胞聽得明。點知葉太講咗開場白兩分幾鐘，有參加者就用廣東話同佢講「你可以講廣東話㗎」。葉太聞言都自嘲普通話水平「無中央台咁好……有點香港口音」。不過佢都堅持用普通話發言，講足20多分鐘，仲話想乘機練習一下。


講公民政黨提名弊端

葉太喺會上都乘機同大家講公民提名同政黨提名嘅弊端，話如果實行公民提名，要使好多錢㗎。佢解釋要拎公民提名變相要選多次，要預先拉一次票。葉太話佢喺2008年嘅立法會選舉中拎到6萬幾票，競選經費要200多萬；2012年競爭激烈，都拎到3萬票，經費又要200多萬。所以佢話如果要拎9萬個公民提名，「即係叫我先使400萬？」葉太又話政府亦都無資源去核實呢啲提名人身分啦。


講到政黨提名，葉太話香港唔係獨立國家，特首由中央政府委任，「係一個高級地方官」，所以唔可以「政黨說了算」。佢強調特首普選方案一定要依從《基本法》。