20米火龍壁畫 村民盼政府勿剷

【明報專訊】本地年輕藝術家創作

法國著名街頭藝術家「Space Invaders」早前喺香港留低多幅馬賽克塗鴉作品，部分畀政府剷走，惹來網民及藝術家話政府唔識貨。有另一名本地藝術家喺歷史悠久嘅薄扶林村以歷史為題，創作咗一幅20幾米長嘅火龍壁畫（上圖，薄扶林村文化環境保育小組圖片），亦可能遇到同一命運。薄扶林村文化環境保育小組代表蕭昆崙話，呢幅壁畫由兩名年輕藝術家創作，佢哋話想送份禮物畀村民，於是喺置富道行車天橋底嘅牆壁畫咗幅12生肖舞火龍畫，配以村內有逾百年嘅歷史地標如牛奶公司草廬、李靈仙姐塔等，村民讚不絕口，話火龍保護條村。


但路政署接到投訴，村民擔心政府會派人剷走塗鴉，於是發起簽名行動，收到逾百個簽名支持保留壁畫。路政署噚日回覆會適當跟進，無講到點處理。蕭昆崙就話收到通知，政府遲啲會安排民政事務處、路政署、區議會同居民開會，傾吓點安排，希望事件有轉機，政府酌情處理居民訴求。