一哥講劉進圖案 紐時都採訪

【明報專訊】警務處長曾偉雄噚日傍晚開記者會，公布《明報》前總編輯劉進圖遇襲案拘捕咗9個人，與高級助理警務處長、刑事及保安處長羅夢熊，以及助理警務處長、港島總區指揮官李建輝一齊見傳媒。近百中外傳媒「迫爆」灣仔警察總部10樓傳媒招待室，就算加櫈後都仲有好多記者無位坐，要企半個鐘。今次記招連平日少採訪警方記者會嘅《紐約時報》、路透社、英國BBC、法新社等都有嚟，搞到「一哥」好似裝咗麗音廣播咁，中英文轉嚟轉去。紐時仲派咗兩名記者，兩人都有發問，可見國際傳媒都好重視呢單案。


外國記者多數都關注點解一哥會講劉進圖遇襲「無直接證據顯示與新聞工作有關係」，同埋內地落網嗰兩名疑人會點移交返香港。紐時其中一名記者則數番之前多宗有關傳媒遇襲案，例如《am730》創辦人施永青、《陽光時務》創辦人陳平等，問吓一哥點解未破案。一哥用英文答﹕「It is unrealistic for members of public to expect that all cases will be detected.（公眾期望所有案件都能偵破是不切實際的）」，又話破唔破到案，受好多連警方都控制唔到嘅因素影響。