陳茂波新政助 CY曾重用

【明報專訊】特首梁振英（CY）嘅班底雖然唔少人走咗，但亦有梁粉夤夜趕科場，早幾年獲CY重用嘅年輕人馮英倫（圖），會喺3月17日加入政府做發展局政治助理，幫發展局長陳茂波搞新界東北同大嶼山發展。馮英倫同Emily講，今次係陳茂波搵佢，至於CY有冇份推薦，佢就話唔知喇。


現年30歲嘅馮英倫喺大學時已經得到CY賞識，做咗CY公務助理7年，又幫佢競選特首。梁粉搞嘅「港人講地」，噚日就上載咗一篇馮英倫「獨家專訪」，寫咗篇稿，軟銷佢話自己係「三無人士」，即無地、無物業、無感情缺失。


Emily見佢喺「獨家專訪」中特別提到自己同屋企人，都無地皮或者物業喺新界東北同大嶼山，點解呢樣咁重要呢？事關佢未來上司陳茂波之前畀人揭發家族持有新界東北地皮嘛。