民記黨慶拍賣黃永玉作品

【明報專訊】民主黨去年黨慶，因為拍賣嘅國畫大師黃永玉作品被質疑係假貨，搞出一場風波；原來民建聯下月舉行嘅籌款晚宴，都會拍賣黃永玉作品，主席譚耀宗話佢哋貨真價實，幅畫至少值幾百萬元。今年民建聯籌款目標係2000萬元，建制派咁多達官貴人、城中富豪，相信要達標唔難。


要籌2000萬 譚主席開金口

民建聯今次籌款仍然用買枱形式，最平嘅8.8萬一張枱，最貴嗰隻就要28萬元，相信單係買枱，民建聯已經籌唔少錢。譚耀宗話，今年佢哋嘅晚宴唔會有太多表演環節，因為要預留時間拍賣，其中重頭戲當然係黃永玉幅畫啦！記得上年黨友、政制及內地事務局副局長劉江華嘅墨寶賣到超過100萬元，相信黃永玉嘅畫作，肯定為民建聯籌到好多錢。


譚耀宗話，今年表演環節包括立法會主席曾鈺成夫婦載歌載舞，據聞今年更加係唱英文歌，譚主席自己亦會開金口。