新App「咪嘥嘢」 追蹤回收桶

【明報專訊】政府成日宣傳叫人回收廢物，但Emily行街時就唔係成日見到回收桶，揸住件垃圾搵回收桶有時都幾難。環保署噚日推出咗「咪嘥嘢」智能手機應用程式（App），方便市民搵4000幾個由政府部門管理嘅三色回收桶，同郊外嘅燒烤叉收集點位置。


Emily噚日率先下載咗呢個App試吓，佢用全球定位系統幫Emily搵到喺《明報》公司附近、行約3分鐘嘅常安街垃圾收集站外，原來擺咗一套三色回收桶（圖），真係方便。個App仲有計算器，幫用戶記錄回收咗幾多物品，仲會教用戶一啲回收小知識。


不過，Emily撳入去「遊戲」度諗住同「大嘥鬼」打機時，就顯示「遊戲即將推出」，睇嚟未預備好。呢個App有iOS同Android版本，稍後會出Windows Phone版。