林依麗：唔會坦克鎮壓佔中

【明報專訊】兩個本身大纜都扯唔埋嘅女人——公民黨主席余若薇（Audrey）同提倡「包二奶刑事化」嘅林依麗，最近因為政改而碰頭。話說林依麗請咗Audrey去佢主持嘅網台節目做嘉賓，大談佔中同政改。林姨姨好認真咁同Audrey講，話肯定中央唔會用坦克車去鎮壓佔中，否則佢就會「人頭博芋頭，畀個頭你（Audrey）坐」。


被問佔中 余：參加前要諗清楚

Audrey去咗林姨姨嘅《港人講事》網台節目受訪，不過林姨姨喺開場白已經「開口夾着脷」，搞錯咗Audrey係公民黨黨魁（黨魁應為梁家傑），為咗打圓場，只好講句「都唔緊要啦，總知你都係我哋嘅女神啦」。


林姨姨除咗關心「包二奶」，原來都好關注佔中，佢問Audrey如果中央用催淚彈驅散佔中人群，搞到啲人「跑啦、亂啦，同踩死人」，之後再將責任推到佔中身上，「你哋會唔會難辭其咎」，Audrey聽完諗咗幾秒，話每個人參加佔中前都要諗清楚，強調公民黨都有去訓練營學和平抗爭。


另外，梁家傑乖女梁穎翹（Jennifer）近日試鏡成功，會參演為期兩年、世界巡演嘅莎劇《哈姆雷特》，不過Jennifer已獲牛津大學取錄修讀法律，睇嚟都要向牛津申請延期入學啦。