鬥大聲 樹根小勝毓民

【明報專訊】立法會資訊科技及廣播事務委員會噚日開會，民建聯鍾樹根同委員會主席黃毓民鬥大聲，樹根仲小勝一仗！話說開會時，黃毓民話樹根「代表某一個集團『隊冧』咗港台」，惹來樹根極度不滿。兩個人「疊聲」糾纏咗幾秒，最後毓民「認輸」，講咗句「你威啦今次」。


被叫錯何俊仁 何俊賢舉電腦

話說當時委員會討論緊延長開設港台副廣播處長（發展）一職5年，樹根一聽到毓民話佢「代表某一個集團『隊冧』咗港台」，即刻好激動咁同毓民理論，提高聲線問「我代表邊個集團？我代表自己」，又話作為議員就係要監督政府。後來毓民為咗可以畀政府官員答問題，所以唔同樹根糾纏。


不過，樹根又有爆笑位，發言時口快快將黨友何俊賢，講成開會時睇女模特兒相嘅民主黨何俊仁。何俊賢一聽到即刻彈起，仲好鬼馬咁舉高自己部平板電腦，用手橫掃幾吓「以示清白」，畀大家知道佢開會時無雜念！