結婚30年 容永祺北京慶祝

【明報專訊】全國政協委員容永祺（Samuel）正喺北京參加兩會，原來佢同太太嘅結婚記念日係3月11日（聽日），年年都撞正兩會會期，適逢今年係佢哋結婚30周年，Samuel話呢個紀念日點都要同老婆見吓面，決定喺北京慶祝吓，仲會同阿仔一齊過。


兩會撞紀念日 7年無正日慶祝

其實Samuel喺7年前做咗政協後，已經無再同太太慶祝過結婚紀念日，因為年年都要開會。雖然係咁，佢今年做嘢都無偷懶，唔會同太太喺正日食飯，因為青聯當日已相約Samuel飯敘。本來佢諗住改今晚，但又撞咗全國政協主席俞正聲請食飯，最終就決定咗噚晚同老婆喺北京馬會會所預祝。


恩愛嘅唔止Samuel，港區人代顏寶鈴嘅老公顏禧強，上星期五亦去咗北京，前日趁顏太無會開，一齊去咗北京市郊玩，噚日下晝已經飛走。被問到呢個時候坐飛機會唔會有啲驚，強哥話無得估咁多，又話昆明火車站斬人案都估唔到會發生，覺得任何人對政府不滿，都唔應該傷害無辜嘅人。