鍾庭耀出席佔中商討日﹕讀數字 非為政治站台

【明報專訊】政協常委李家傑日前點名批評鍾庭耀主持嘅港大民研，「總在關鍵時候，發表對中央政府、特區政府、整個愛國愛港陣營十分不利的民調結果」，身經百戰嘅民研計劃總監鍾庭耀從容面對，噚日如常出席「和平佔中」商討日總結及前瞻大會，公布佔中參加者早前嘅投票結果。


鍾庭耀一出場就贏得唔少支持掌聲，不過佢一如以往，不慍不火宣讀調查結果，重申自己只係發表「數字」，並非為大家政治站台。


提供服務 因認同民主商討

鍾庭耀噚日重申，港大民研同埋佢本人對佔中無既定立場，港大民研喺政治上絕對中立，而佢哋為佔中提供服務同支援，只因為大家對民主商討、全民授權嘅理念不謀而合，歡迎擁有同樣理念嘅團體合作，不論其政治背景。


其實噚日公布嘅投票題目都幾惹火，包括中央是否有權不任命特首候選人，但鍾庭耀一早做好「利申」，笑言自己法律常識有限，一再重申自己只係讀數字，最後仲講一句，「我並非為大家政治站台，多謝大家！」

「民意基礎非由研究組織做出嚟」

一眾記者又點會輕易放過佢呢，幾經追訪，鍾庭耀終於喺會後講多一句，話民意基礎唔係由研究組織做出嚟，若有市民支持，不同調查機構研究都會得出相同結果。