CY自比梅花：耐寒能受壓

【明報專訊】好記性嘅讀者相信都記得前特首曾蔭權曾經透露，佢自己會以擦鞋減壓，至於現任特首梁振英（CY）就鍾意耕田種菜減壓。CY喺接受內地傳媒訪問時，再次透露對佢嚟講最好嘅減壓方法係種植，佢話種花、種瓜、種茶、種果樹都識。其實，唔少政界人士都收過CY用自己親手種嘅蔬菜做禮物，反應都唔錯。


內地記者追問CY，問佢覺得邊種花似佢嘅性格，CY就話有幾種都似，例如梅花，話因為梅花耐寒，能夠承受壓力，喺嚴寒冬天中梅花可以捱得住。Emily唔知讀者係咪認同CY以梅花自比？


記者再問佢，覺得國家同香港嘅未來會點樣，佢話中華民族係偉大民族，有悠久歷史、燦爛文化，香港作為中國一部分，亦一齊分享國家發展嘅巨大潛力，作為國家一分子，香港同國家係有共同命運、共同中國夢。講呢啲，好標準答案喎！