寫真送何俊仁 雞毛掃贈何太

【明報專訊】「正義聯盟」5個成員，噚日拎住5本亞洲模特兒寫真集同5支雞毛掃去立法會門外示威，抗議民主黨立法會議員何俊仁之前喺財政預算案宣讀期間睇性感女模特兒照片。召集人李偲嫣帶頭叫口號要求何俊仁下台，仲話 「睇女請回家」。李偲嫣話，寫真集送畀何俊仁返屋企睇；雞毛掃係送俾何俊仁太太，等佢可以管理老公。


何俊仁無親自收「禮物」，民主黨嘅員工就話大家都忙緊，亦無派出代表，搞到正義聯盟好激動話要踩上何俊仁喺立法會嘅辦公室，一眾保安員立即嚴陣以待。擾攘咗10幾分鐘，由立法會收發組同事代收。李偲嫣仲氣上心頭，聲言會繼續狙擊何俊仁咁講。


黃碧雲：睇sexy照唔等於道德犯錯

民主黨黃碧雲一向好關注婦女事務，噚日被問到，如果太太發現老公睇性感模特兒照片可以點做，心水清嘅佢就話唔會評論何俊仁事件，仲話唔希望社會片面解讀「睇呢啲sexy照片就等於道德上犯錯」。