夢熊：阿女支持我遊行

【明報專訊】特首梁振英（CY）嘅二女梁齊昕，早前喺facebook發表「劉進圖遇襲與新聞自由無關」言論，惹起網民批評。曾經支持CY參選特首嘅前全國政協委員劉夢熊（圖）噚日現身記協默站行動，同記者講起CY上場後新聞自由倒退已是不爭事實，仲主動話自己個女「非常支持」佢遊行，唔知係咪話中有話呢。


「CY講嘢未必句句真理」

咁佢又點睇CY女兒言論？劉夢熊就話佢只係細路女，「就算佢老竇CY講嘅嘢，都未必係句句真理啦」，叫大家毋須太在意。至於同樣有份支持CY參選嘅導演張堅庭，被問到CY個女言論時，就話作為家長，CY女兒言論反映佢思考及辯論水平唔高，仲話佢教仔女時，都會叫仔女諗吓點解咁多香港人會有海外護照，原因正係如果香港真係無咗自由，都可以選擇離開，反映自由對香港真係好重要。Emily噚日再去CY女兒個fb睇吓，唔見佢再發表新聞自由嘅言論，只係上載咗同朋友食飯嘅相。