唔答同CY關係 財爺用老婆甩身

【明報專訊】財政司長曾俊華提出「居安思危」，但特首梁振英（CY）喺《施政報告》主張派福利，財爺噚日出席電台預算案論壇，有主持就請財爺，喺「非常好」、「一般」同「非常差」之間，描述一下佢同CY嘅關係，面對呢個突如其來嘅提問，財爺當堂打咗個突，笑笑口話﹕「可唔可以唔揀任何一個？」最終擺埋老婆上枱先甩到身。


話結婚幾十年 無100%認同

主持問佢，「有無諗過成為特首呢？」財爺就直截了當答「無！」財爺話喎，同特首喺「同一政府工作」、「無兩個人會100%事情都有認同」，就算自己已經同太太結婚幾十年，都唔會「有100%認同」，有一半事認同已經「非常好」，而有機會同特首喺政府內表達大家不同意見，可以令政府施政「更加完美」。


有主持又問，財爺提出7年後或有結構性財赤，係咪意味如果梁振英破壞紀律，行福利主義，佢會阻止呢？財爺話﹕「我相信事情唔會發生，因為大家都知道《基本法》107（條，即財政預算以量入為出為原則等）呢個要求」、「我相信特首都很明白這件事」。