「不信命運信機會」財爺今年出《交叉點》

【明報專訊】繼舊年以《天各一方》歌詞「你有你嘅生活，我有我嘅忙碌」為財政預算案結尾，今年財爺繼續玩懷舊金句，用歌手夏韶聲嘅名曲《交叉點》中嘅「不信命運，但信機會」（圖）總結預算案。曾俊華用「交叉點」，唔通係暗示香港嘅財政到咗「交叉點」，收入同支出愈走愈遠？定係暗示自己仕途走上「交叉點」？皆因呢首歌仲有一句「艱苦險惡道路續上一段段，論到得失未到終點誰又可計算」。


表達香港兒女真本色

去年財爺曾惹起臆測，令大家聯想佢同特首梁振英嘅關係係咪「天各一方」；今年佢又憑歌寄意，話「不信命運，但信機會」，係想講香港兒女嘅真正本色，港人積極、樂觀、永不言敗，唔會為任何難題而改變喎。


財爺又引用愛爾蘭哲學家Edmund Burke嘅金句，「社會是一種合作關係，不單是這一代人之間的合作，也是我們跟前人，以及未來一代的合作」，希望等大家明白「審慎理財」嘅重要，因為會影響下一代人。


講開合作，一向少談政制嘅財爺，喺預算案第三段都談政改，話社會正就2017年特首選舉及2016年立法會產生辦法進行討論，「我殷切期望社會能夠求同存異，達至共識，實現普選」。