雷競斌拒談「搣柴」傳聞

【明報專訊】以「香港良心」自居嘅亞視傳出高層變動消息，網上媒體巴士的報報稱，聽聞亞視執行董事雷競斌（吔叔）被「搣柴」，不再擔任執行董事，但未知係咪仍然兼任高級副總裁。報道引述消息話佢同亞視主要投資者王征有意見衝突，吔叔炒咗王征一名親信，令佢被撤職。消息又話吔叔去咗通訊事務管理局投訴有人違反「不控制承諾」。


吔叔本來係《大公報》執行總編輯，舊年8月被王征請去頂替盛品儒做執董。究竟呢個消息係咪堅，Emily搵過吔叔求證，佢一聽電話就叫Emily搵公關部，然後就收線。但亞視公關部噚晚就話未有消息。Emily上網查埋公司註冊處資料，未見亞視近幾個月有更換董事。


通訊局：有人投訴亞視

通訊事務管理局發言人話，已收到一名公眾人士投訴亞視嘅控制同管理，將按既定程序處理。發言人話，亞視作為本地電視節目服務持牌機構，若有任何董事或主要人員方面變動，須根據《廣播條例》喺7天內通知通訊局，現時局方未有收到亞視通知。