幫港出聲周日「示範集會」

【明報專訊】反佔中團體「幫港出聲」又有新搞作，佢哋會喺3月2號（周日）下午2點15分喺中環遮打花園舉行「和平香港起動」，發起人周融話邀請咗多個社區領袖、立法會議員同區議員任發起人，希望大家同心協力推動「和平合法，促成普選」。佢話家「幫港出聲」有10萬個支持者，所以估計當日會有2000人出席。佢強調唔係同佔中打對台，但就希望類似活動可以遍地開花。


「和平香港」 要小人物發聲

周融話好擔心佔中會演變成動亂，所以搞個集會做個「示範單位」畀大家睇。仲話已經有150幾個社區領袖加入「和平香港」發起人行列。Emily問周融有咩立法會議員做發起人，或者當日會唔會有重量級嘉賓，周融就話呢啲活動要靠「地頭龍」，又話唔係要大人物，而係需要小人物站出來發聲。佢唔肯講明有邊個加入，淨係叫Emily留意聽日（周五）喺多份報章嘅廣告，話到時會有名單公布。


集會當日會派發幾千個印上「和平香港」嘅氣球，仲會有「和平或動亂」圖片展，展出60多張對比和平嘅香港同世界各地動亂嘅相片，以及播3分鐘宣傳短片。周融話希望將來一星期可以有十次八次類似展覽同活動，透過群眾壓力，等支持佔中嘅議員回頭是岸。