周一嶽憶歐遊學搭地鐵

【明報專訊】早前有團體發起「驅蝗行動」引起爭議，平機會主席周一嶽再為事件出聲，但今次唔係鬧人無聊，而係苦口婆心叫港人將心比己，話我哋自己去外國旅行，都唔想被人針對同侵犯，所以唔好咁樣對內地旅客。講起港人不滿有內地人打尖同唔注重衛生，周醫生講番自己那些年嘅「無知」經歷，叫香港人包容啲。


首搭地鐵「才知要企埋一邊」

周醫生喺港台《千禧年代》話，當年香港仲未有地鐵時，佢喺歐洲第一次搭地鐵，先至知道搭扶手電梯時要企埋一邊，讓出另一邊畀人行；亦都係嗰次歐洲之旅，令佢覺得要學習排隊。佢話，內地旅客嚟香港，其實都想體驗香港嘅自由、秩序同文明，港人好應該示範一下。


之前有市民特登喺鬧市拖篋諷刺內地客，有人話咁做係「行為藝術」，周醫生噚日就笑笑口咁話：「藝字有兩種寫法，若將胡說八道、鬧人都當成行為藝術，我唔能夠認同。」兩種寫法？Emily即時諗起「藝」同「偽」，唔知啱唔啱呢？


鄭耀棠：應檢控稱內地人「蝗蟲」者

提起驅蝗，港區人代鄭耀棠都火起，批評有港人稱內地人為「蝗蟲」係「極端歧視」，話發表呢啲言論嘅人「應受檢控」。不過，當被問到「檢控」有何法律依據，佢就叫記者「睇番人權公約點講」。