財爺捧場 師弟劍擊奪冠

【明報專訊】財政預算案發表前夕，財政司長曾俊華噚日仲有閒情，去睇中學校際劍擊比賽，為母校喇沙嘅劍擊隊師弟打氣。Emily問財爺觀賽之餘係咪順便減壓，財爺笑住話份預算案已經「拎咗去印啦」，仲讚一班師弟「打得幾好」。唔知係咪得到師父兼大師兄嘅鼓勵，喇沙劍擊隊今年同勁敵男拔萃劍擊隊同分，齊齊獲得總冠軍。


網誌借劍擊論人生

財爺除咗落場睇比賽外，仲喺睇比賽前寫網誌，話好彩預算案嘅工作「完成得八八九九」，所以可以去體育館為喇沙劍擊隊打氣。佢仲喺網誌度借劍擊論人生，話多年嚟都有返母校教師弟打劍，而佢會同學生重複同一番話﹕「一個比你好的對手，和你打十場，他可能贏你九場，你只能贏一場。現在你就是要將那第十場的賽果，安排在今天出現。」佢話呢個道理說來容易，但執行非常困難，因為需要劍手嘅心理質素好，亦要教練長時間從旁指導配合。唔知師弟噚日係咪全因為呢番話，贏得呢場大賽呢。


財爺仲話劍擊係一種對抗性比賽，劍手真正出劍時間唔多，大部分時間係雙方對峙、窺伺對方破綻，過程講求極高嘅意志力同集中力，稍有不慎就會被對手乘虛而入。預算案公布在即，「拉布戰」亦一觸即發，財爺練劍咁多年，相信應該有良好嘅心理質素同對手過招啦。