梁鳳儀新工研究危機

【明報專訊】上年12月31日離職嘅前財經事務及庫務局副局長梁鳳儀，話咁快就搵到好工，3月1日開始，佢會身兼兩職，一個係美國哈佛大學亞洲中心研究員，另一個係做Official Monetary and Financial Institutions Forum（OMFIF）嘅高級顧問，要寫文研究亞洲政府點樣應付全球金融危機同埋採取嘅規管措施。


OMFIF來頭唔小，設立平台畀各國及地區嘅中央銀行同私人機構、學者交流意見。佢哋喺網站介紹，由於諗住未來幾年增加喺亞洲方面嘅工作同活動，所以請梁鳳儀幫手，等OMFIF可以同亞洲嘅中央銀行同官方機構有更好嘅合作。


副局長離職後一年內再工作，要諮詢「前任行政長官及政治委任官員離職後工作諮詢委員會」意見，不過，委員會無權阻止副局長做新工。諮詢委員會嘅意見，係梁鳳儀唔應該牽涉喺同政府有關嘅游說工作、談判、索償，亦唔應該競投財經局等部門嘅招標項目，以及向任何人講佢做副局長時得悉嘅機密資料。