AO面試題目曝光

【明報專訊】又到一年一度政府請AO（政務主任）嘅大日子，須知道，AO面試必定會問時事常識，有應徵者同Emily講，話被問到《明報》換總編輯同埋商台炒李慧玲呢兩件事與新聞自由嘅關係，覺得好難答。有前AO就叫考生最緊要按自己意見分析事件，唔好亂捉路。


有應徵者話，佢嘅面試題目有一條係問佢點睇《明報》換總編輯；之後考官再問佢點睇「出面有指係特首令到商台炒李慧玲」，同埋呢兩件事反唔反映到新聞自由受影響。


曾經做過AO嘅黃明樂話，政府多數問政策議題，例如以前常問嘅最低工資睇法，但如果考生被問到政治問題，記得唔好猜度考官想要咩答案，因為政府唔會透過面試審查考生嘅政治立場，而係想知道考生嘅推論及分析力。