學民宣傳遊戲App吸金

【明報專訊】正努力游說政黨發動「五區公投」嘅學民思潮，唔止需要牙力，仲需要經費營運。學民仔一向吸金力強，Emily知道佢哋諗咗條橋籌錢，就係同遊戲開發商Kit Da Studio合作，由學民幫手宣傳包含香港特色、社會及政治議題嘅手機應用程式「Touch Hero, Inc」，市民今個月16號起至3月1號購買呢個App，收入全數會捐畀學民思潮。


呢個App有100個小遊戲，花16蚊可以買晒，個App嘅開發者叫Kit Man，佢話前年見市民成功推倒國民教育科，發現發聲係有用嘅，於是喺facebook發布自己嘅政治漫畫。


玩熨平六四Tee等百個遊戲

Kit Man話佢呢個App遊戲融入咗政治議題，例如玩家要操控遊戲角色，熨平件寫住「六四」嘅衫，象徵平反六四；又例如遊戲角色要無懼警棍扑落嚟，不斷高舉寫住「We don't need no thought control」（我們不需要思想控制）嘅示威牌。