田二少又有伙計去工黨

【明報專訊】新民黨早前同公民力量結盟，令佢哋嘅地區實力大增，不過，Emily聽聞，該黨副主席田北辰嘅地區，又有職員跳槽「轉投敵陣」，加盟民主派嘅工黨，今次已經係第二次有新民黨職員過檔工黨，睇嚟田二少都要諗諗計留住人。


地區消息話，繼早前田二少助理趙恩來突然過檔工黨，大家先知佢做支聯會義工多年；原來1月中田二少喺荃灣一個地區幹事亦去咗工黨，消息令唔少建制派地區成員驚訝，慨嘆點解呢類事情總係發生喺田二少身上。


田：幹事屬泛民底

田二少同Emily講，呢位地區幹事嘅太太係地區業委會成員，當日支持佢係因為見佢做工作較對手硬淨，但做做吓發現唔多認同佢嘅政治理念，始終該幹事諗法屬「泛民底」，所以最終離開。佢話趙恩來早前離開時，連佢喺地區工作3年嘅database都帶走埋，令田二少好無奈，今次就無發生呢類不愉快事件。