鐵人教練揸鑽的載長者團年

【明報專訊】做過7年會計師、現職三項鐵人教練嘅石啟右（石sir），家月入約萬五，生活無憂嘅佢，舊年年尾發現接載輪椅人士嘅「鑽的」唔夠司機，決定part-time揸「鑽的」，專做少人願意做嘅夜更同頂更。年初一當晚，人人同屋企人過年，佢就做足10幾個鐘，接載需要輪椅輔助嘅長者同家人相聚。


初一照接輪椅長者

石sir話，因為「鑽的」用電油，每公升電油要約17元，貴過石油氣成倍，好少人願意揸，夜更生意少，亦不時唔夠人。佢話，始終有輪椅人士需要出街，「我識揸車，又一早考咗的士牌，幫到人就幫，我都想令人開心」。


年初一晚，人人慶新年，無咩司機返工，石sir決定放棄假期返工。佢話，好多要輪椅輔助嘅老人家，新年難得同屋企人團聚，無車出入好唔方便。


佢家逢星期六返晏，4點到凌晨6點，假期頂更，月入約2000幾蚊，有時淡靜啲，收入就少啲，「賺幾多都唔緊要，最緊要幫到人」。


「鑽的」行政總裁梁淑儀話，家有6架鑽的，其中一架欠夜更司機。佢話計劃今年首季同旅行社合作推出「無障礙自由行」本地半日團，用鑽的接載需要輪椅輔助嘅旅客，連埋導遊，收費約3000元至4000元。