新聞類別
財經
詳情#
【明報專訊】近年內地旅客迫爆澳門，以柬埔寨為大本營嘅金界（3918），雖然舊年前9個月股價跑贏一眾濠賭股，不過唔知係咪唔夠內地自由行人士踩旺個場，最後一季都係被銀娛（0027）同新濠（6883）爬頭。不過金界管理層就諗到條橋，就係自己搵兩架空中巴士，由內地幾個大城市同澳門接待遊客去金邊玩，搞旺自己個場。金界行政總裁曾立強話，呢個計劃已經搞得七七八八，估計上半年可以搞掂，「希望以後啲客如果響澳門輸咗錢，可以同佢哋講過嚟金邊換下手氣」。
每架空巴1000萬美金 未決定租定買
金界舊年業績十分靚仔，博彩收入按年增長25%至3.2億美金，純利就增加24%至1.4億美元，末期股息每股派18.45港仙。總收入入面，中國遊客貢獻15至20%。
展望2014年，曾立強話最重要係三點：人頭數、推廣同埋中國。佢話中國市場最關鍵就係搞掂架飛機，因為中國無乜航班飛柬埔寨，而澳門直情無直航航班去金邊。佢話家諗住搵兩架140座位嘅空中巴士，同內地旅行社合作帶遊客去金邊，暫時打算每星期飛一到兩次，估計每星期可以載到200人左右。
曾立強話，因為飛機、酒店、餐飲同旅遊車都係金界私伙，肯定可以畀到最好嘅條件開package，而金界就主要喺個賭場度賺錢。不過講來講去，最核心都係嗰兩架空中巴士，估計每架盛惠1000萬美金，所以佢話仲未決定租定買喎。
email: piano@mingpao.com
[小琴密語]
留言 (0)
