蔣麗芸派萬個膠袋

【明報專訊】民建聯蔣麗芸（Ann姐）新春期間去郵輪團，結果發生糾紛，仲被指帶領團友「佔領郵輪」，但無損佢嘅心情，噚日同傳媒聚會時仲向記者朋友「派膠」——一個印滿佢個名嘅膠質袋仔，方便大家袋電話等隨身物品。Ann姐話上年佢整利市封被批評唔環保，所以今年整膠袋仔，自己出咗7、8萬蚊整咗1萬個，派畀義工同街坊等。


對於政協常委陳永棋形容Ann姐坐嘅唔係郵輪，佢認同呢個講法，因為郵輪應該好舒服、食物好味，但佢彈呢次嘅食物唔好，話去戲院買嘅熱狗條腸仔都好食過船上嘅，又話求其去美心等餐廳，食物質素都一定較好。


彈郵輪食物難食

但Ann姐強調佢哋唔係「旅霸」，其實乘客都係中產，大家咁激動只係諗住新年成家人去玩，點知遇上懷疑涉詐騙成分事件，加上船上職員態度好差先會搞成咁。佢又話早一晚都勸乘客落船，但乘客就叫佢先返房休息，但佢都承認自己可以處理得好啲。


喺呢件事上，商務及經濟發展局長蘇錦樑亦有慰問佢，局長當日喺電視見到Ann姐喺船上接受記者訪問，立即打畀佢，並叫旅遊事務專員容偉雄跟進，最終事件能解決。


立法會主席曾鈺成原來新春亦坐郵輪，但佢坐嘅係皇家加勒比國際郵輪，去加勒比海玩咗一星期，仲講笑話都想見到海盜但無發現。