公民黨28歲大狀有意出選

【明報專訊】雖然明年底先有區議會選舉，但各黨派都已經積極部署，噚日公民黨黨魁梁家傑同記者茶敘，亦帶埋幾個後起之秀出嚟，除咗本身係飛機師嘅譚文豪、青年公民主席梁穎敏外，仲有一個28歲嘅大律師余俊翔（Peter），亦積極喺東涌發展緊地區工作，據聞佢亦有意參選嚟緊嘅離島區議會補選。


Peter話佢入咗黨大半年，但都喺東涌服務咗一段日子，相信東涌未來發展會有好多轉變，希望用專業為社區服務。呢啲年輕專業人士都被視為「筍盤」，但Emily聽聞佢已經結咗婚喇。


嚴格師徒制評核工作

梁家傑話，民主派內部協調區選大致完成，公民黨有40幾個選區可派人出選，黨內亦有嚴格師徒制，大約有30幾個黨友參與。呢個考勤制度非常嚴謹，會計算參與者出席社會運動嘅次數等，黨主席余若薇會同各人逐個見面，考核吓佢哋嘅工作做成點。梁家傑話公民黨極可能唔會喺40幾個區都派人參選，但呢個師徒制，如果參與者做得唔好，一樣會肥佬，唔係保證實有得選㗎，以免分薄其他人資源，影響勝算。