資深報人籌辦新報紙

【明報專訊】有人話傳媒愈來愈難撈，但又有唔少人加入，除咗香港電視就快開台要請人，兩位曾效力《東方日報》嘅資深報人黃陽午同郭慶榕，噚日以「《香港晨報》籌組委員會」發表聲明，宣布搞份新報紙《香港晨報》。佢哋強調，資金係本地基金，唔係內地錢，仲話遲啲會公布財團資料。


黃陽午同郭慶榕來頭唔細，係呢行嘅老行尊，兩人都曾喺東方做過高層，黃陽午曾做過總編輯，郭慶榕就曾做過社長。Emily查過公司註冊處資料，發現香港晨報傳媒集團有限公司，只有一個董事利婉嫻，佢都曾喺東方做過。至於《香港晨報》唯一股東，就係一間叫「國威控股有限公司」嘅英屬處女島離岸公司，背後係咩人就查唔到啦。


黃陽午同郭慶榕喺聲明中話，《香港晨報》係由一班本地資深傳媒人籌辦，現已進入全面籌辦階段，但就無提到呢份報紙究竟係收費報定免費報。


蒯轍元否認辦報

網報《巴士的報》早前引述消息話，《香港晨報》幕後話事人係經常喺親中報章發表署名文章嘅蒯轍元，但蒯轍元噚日喺網誌否認辦報。