大輝「空運」日式火鍋立會開餐

【明報專訊】人稱「立法會四散人」嘅林大輝、謝偉銓、陳健波及梁家騮噚日同傳媒團拜飯聚。大輝話，佢前晚先至返到香港，佢係趁農曆年假期，同太太及一班圈外朋友，去日本福岡旅行避年。人哋去日本，通常會拎一袋二袋日式食品返港當手信，但大輝就好霸氣，去當地一間餐廳食日式火鍋，覺得好正，所以就用5萬日圓、即係近4000港元，訂購成套鍋具返香港，一個禮拜後空運送到。


大輝話，佢哋去酒店餐廳食日式火鍋，原來食法唔係用熱湯浸，而係將牛肉等食材放喺日式透氣木盒內，然後將木盒放喺蒸爐上，再用熱氣蒸幾分鐘煮熟盒內食物，咁做就唔會流失食物嘅原味咁話。大輝覺得呢套食具好特別，所以搵餐廳經理幫佢打電話去餐具工廠訂購一套。


大輝話，呢套食具設計夠4人一齊用，仲講笑咁話，如果蒸鍋送到香港，可以諗吓拎去立法會同大家一齊玩日式打邊爐！