朱牧被罵「神棍」諗起「愛」

【明報專訊】由人民力量等組織成立嘅「佔中後援會」，約10多名成員噚日趁民主黨喺中環搞「佔中先鋒」宣誓，走去踩場，大罵民主黨「賣香港」，就連同場嘅和平佔中發起人朱耀明（朱牧）亦遭殃，新年流流被人稱呼「神棍」、「耶X」，仲叫佢「落地獄」！不過，朱牧一笑置之，仲笑言對上一次鬧佢係「神棍」嘅正好係「愛港之聲」。原來佔中後援會同「愛字頭」都有「共通語言」。


「愛港之聲」都咁鬧過

朱牧話，佢第一次以佔中發起人身分出席《城市論壇》時，已畀前愛港之聲成員傅振中「開齋」鬧過「神棍」，今次再被罵「神棍」，朱牧話自己好似畀「另一個愛字派」鬧緊咁，但今次「神棍」之言出自泛民口中，難免有啲難過，「為佢哋難過，民主嘅精神係對人性尊嚴嘅尊重，你用粗言穢語侮辱人，好難說服到人你係爭取民主」。