馬雲：好員工要聽話

【明報專訊】阿里巴巴創辦人馬雲出名金句多，近兩日就喺自己來往扎堆入面先後發咗兩篇文，其中一篇教人點樣做好員工，一睇就知道又有員工激親佢，因為嗰篇帖文劈頭就話，佢鍾意又能幹又聽話嘅員工，仲話「不聽話本身就是不能幹的表現」！

鼓勵小朋友又讀書又玩

小琴齋睇文字都感受到「老馬有火」，仲諗起佢幾年前寫畀員工嘅公開信，講到明入職未滿一年嘅員工「千萬別給我寫發展戰略報告」。睇嚟今次又係有新員工唔聽話，亂咁講嘢。馬雲鍾意聽話嘅員工，唔知道又鍾唔鍾意聽話嘅股東呢？不過，股東聽唔聽話都唔緊要啦，皆因阿里巴巴行合伙人制㗎嘛！


另外一篇文就係鼓勵小朋友讀書之餘都要玩，只有書呆子先至「光讀書不會玩」。不過佢寫寫下，唔知係咪諗番起自己個囝流連網吧嘅歲月，所以補多句「光會玩，沒有知識，也就是非常低層次的玩」。唔知集團行政總裁陸兆禧玩來往嘅「打企鵝」遊戲，玩到積分榜上排名第二，又算唔算係高層次嘅玩呢？


[小琴密語]