鄉委團拜當眾罵官

【明報專訊】新正頭應該一團和氣，但沙田鄉事委員會噚日團拜就有少少火氣，事關鄉委會主席莫錦貴喺致辭時，不忘炮轟政府將鄉村同私人土地納入郊野公園嘅政策，形容政府用私人權益去討好行山人士，係「政府請客、我哋找數」。貴哥又話，政治犧牲都要講代價，政府拎咗佢哋嘅嘢，「一毫子都唔賠，擺明係搶」。當時唔少官員包括成枱地政官員都在場，難得大家食飯仲能夠有講有笑，今時今日做官都唔易。


新民黨區議員將加入公民力量

公民力量元老級人馬、沙田區議會前主席韋國洪亦有畀面參加團拜，佢透露公民力量執委會主席潘國山將加入新民黨做副主席。新民黨所有區議員，嚟緊亦會加入公民力量，最終兩個組織嘅區議員都會戴「兩頂帽」。問到係咪為立會選舉部署，佢話要搞好區議會先諗立法會！


新民黨主席葉劉淑儀話，會喺2月11日開特別黨員大會，等黨員決定，佢亦歡迎公民力量加入新民黨高層，認為可幫新民黨更了解新界東問題。