李偲嫣﹕組救傷隊反佔中

【明報專訊】「正義聯盟」會長李偲嫣積極反佔領中環，噚日就喺中環街頭開記者會，話嚟緊要落區招募1.5萬至2萬名義工，組成糾察隊，呼籲市民唔好佔中，仲聲言話要應付可能發生嘅突發事件，急救受傷市民喎。


正義聯盟話，支持佔中嘅人本身就最唔民主，又拉埋泰國、埃及嘅動亂嚟講，話無人會信佔中真係會「愛與和平」，所以佢哋決定成立「正義糾察救傷隊」，喺佔中發生時幫市民同支援警方，去維護香港穩定，減少不必要嘅意外同破壞。


其實，佔中已講明，就算舉行佔中，都只係會坐喺地下等警察拉，但李偲嫣就講極都唔明，仲話3月會展開「愛與關懷反佔中」行動，用流動宣傳車喺各區賣廣告、擺街站招募義工，仲提供基本救傷、基本功夫，甚至情緒管理訓練，令義工面對暴力侮辱都可以平心靜氣面對，同埋開導激動者。


陳健民明去維園寫揮春

講開佔中，佢哋都會趁新年前做宣傳，搞「愛與和平，阿媽都明，民主必勝，一男子停！」發起人陳健民周三下午5至8時去維園寫揮春，戴耀廷同晚會去大埔花市派利市封。