新聞類別
財經
詳情#
【明報專訊】正當餐廳東主個個呻生意難做，那邊廂稻香（0573）嘅飲食王國就愈做愈大，由原本主打酒樓同中式食肆，擴展到去自助餐、日本菜等。舊年底，佢哋又開咗間泰昌餅家概念店「T CAFE 1954」，將老字號泰昌「升呢」成甚具懷舊feel嘅港式冰室。
有信心半年後收支平衡
稻香噚日遨請小琴同一班記者到呢間cafe試食，店內有綠白階磚、吊扇等裝飾，置身其中，令人覺得時光好似倒流到五十年代嘅舊香港。店內除咗有賣泰昌嘅麵包，仲提供埋西餐、甜品同咖啡，不可不試的，係佢哋嘅DIY食品巴馬火腿菠蘿包，賣成40蚊，絕對係非一般嘅菠蘿包。至於普通set lunch就40至60蚊，晚餐80至90蚊，但為咗吸引人流，晚餐家八五折酬賓。
稻香行政總裁梁耀進話，呢間cafe投資咗成400萬元，但好有信心開業半年後可以收支平衡。至於係咪再開，「始終係第一間，想做好個品牌先」，佢話等間舖上咗軌道，先再諗擴張。不過業務部總經理吳彩霞就話，今年會響大埔、沙田等新市鎮，開多1至2間。
除咗間cafe，梁耀進話今年香港會再開3至4間食肆，泰昌餅家開多4至5家，舊年收購嘅烘焙達人開6至7間，內地亦會開7家新食肆，主要位於廣東省。內地限制三公消費，集團生意都受到影響，不過梁耀進話今年6月底止中期應該接近見底，下半年生意會反彈，同店增長可以持平或錄得輕微升幅。不過因為營運成本增加， 香港嘅晚市可能會響今年首季加價2%至3%。
email: piano@mingpao.com
[小琴密語]
留言 (0)
