美荷樓開業 11元入住

【明報專訊】香港碩果僅存第一座徙置公屋、石硤尾嘅美荷樓如今已活化成YHA青年旅舍，經過近兩個月試業，噚日正式開業。青年旅舍協會總幹事曾凱琪話，旅舍試業期間開咗58間房，預訂同入住率持續上升，本地客佔四成，仲透露聖誕同新年檔期預訂率近八成。


14懷舊房 綠白地磚掛舊照

美荷樓正式開業時可提供129間客房，當中最特別係有14間懷舊主題房間，鋪設六七十年代綠白相間地磚、懷舊家具同玩具擺設，仲掛咗多幅昔日石硤尾街坊珍貴舊照片，夠晒本土人情味。


適逢明年係美荷樓踏入60周年，旅舍特別推出入住大抽獎，60個得獎者，只需畀11元，即等同1954年時美荷樓嘅每月租金，就可入住旅舍價值680元嘅普通雙人房一晚。有興趣嘅話可於今日起至明年1月30日，登入青年旅舍協會網站，或親身到協會總辦事處或旅舍登記參加抽獎，結果喺明年2月13日公布。今日起，逢周二至周日朝早，旅舍舉辦免費導賞團，介紹美荷樓歷史同建築特色，要注意事前要網上登記預約。


陳智思：超出我期望

有份主持開幕禮嘅活化歷史建築諮詢委員會主席陳智思對旅舍非常滿意，「超出我原來期望」，話會畀10分滿分，因為旅舍設有生活館，展出當年街坊生活點滴。佢話，對過往無機會體驗呢類住宿環境嘅現今一代係好好嘅教育，仲話有機會都想畀兩個仔入住體驗。