攝影大師野豬驚魂

【明報專訊】登山攝影師尹子聰（Simon）10年前喺全港134個山頭留低過腳毛，今年12月1號再出發，重遊舊地影相，預計用18日行晒600公里路。Simon一直都好順利，不過噚日就有少少驚險，一個人喺山上同一群野豬面對面狹路相逢，好彩有驚無險，Simon亂叫一通，野豬就朝向其他方向跑。佢喺facebook講笑：「崇山峻嶺……無難度，遇上野豬……速速逃！」不過Simon提醒讀者千祈唔好模仿佢咁做！


其實，之前有專家同Emily講過，遇到野豬，要冷靜咁慢慢離開，千祈唔好大叫或者急跑，以免刺激佢哋。除咗遇到野豬，Simon話，試過一個人半夜4點幾凍醒，喺600幾米高嘅黃嶺等日出！


本月7日荃錦坳營地燒烤分享

今個月7號傍晚，Simon會行到荃錦坳營地，到時會同大家一齊燒烤，分享山上嘅經歷，歡迎市民嚟為佢打氣，第二日仲可以同佢一齊上大帽山