何建宗清華做訪問學者

【明報專訊】喺新界東北發展風波中，因為無申報自己家族生產「黑旋風」殺蟲水，即持有新界東北土地，結果喺8月要辭職嘅發展局前政治助理何建宗（小圖），好快已經有新工作，但今次唔係咩政府工作，而係去清華大學做訪問學者，其間並唔受薪。


政助張秀麗今last day

政府噚日出稿話，前任行政長官及政治委任官員離職之後工作諮詢委員會批准何建宗呢份工作。


睇番政府對何建宗申請嘅意見列明，何建宗唔可以用任何機密資料或者做政助時得悉，但又唔係公眾已知嘅資料，作為佢教書時嘅教材；其間亦唔可以參與任何發展局、屋宇署等相關部門委託嘅項目、報告或研究。


今屆政府有3個政助辭職，計埋何建宗已經有兩人搵到新工，而政務司長嘅政助張秀麗，今日亦會last day。