青姐大玩「制服誘惑」

【明報專訊】早幾日收到股評人青姐（胡孟青）電話，話要畀小琴一個驚喜，於是噚日小琴按佢指示走去中環間大家樂，心諗「唔通你呢位大家樂代言人」又有新廣告？上到去，原來係大家樂慶祝成立45周年，推出「一蚊雞」下午茶感謝優惠，青姐更加係玩到盡，粉墨登場著住度身訂做嘅大家樂1980年代制服。


睇見青姐嘅「制服誘惑」，全場立即傳來歡呼，不過著住制服嘅佢依然不離老本行，「股評人」上身幫大家樂個活動推銷，仲話優惠下午茶值得「趁低吸納」，「好似買股票咁，三個字：手快有，手慢無」。活動後青姐仲大啖佢最鍾意嘅大家樂炸雞髀，做足代言人本分。


推介「醜股」中鋁國美

小琴一場嚟到，點都要捉住青姐講番個市幾句。雖然噚日港股十分波動，不過青姐話冇有怕：「穿2萬2都唔使驚喎，呢個位會開始有人出手入貨」，點解咁有信心？「家樓同債都唔好炒，咁最好當然係買股票啦」，佢仲醒咗貼士畀小琴，要揀就揀最近表現「醜股大翻身」嗰啲公司：「好似2600（中國鋁業）、0493（國美），我都入咗啲貨㗎。」


email: piano@mingpao.com