民主黨黨慶 唐唐捐名酒

【明報專訊】民主黨10月4日（下周五）會舉行19周年黨慶籌款晚宴，做咗民主黨籌款委員會主席嘅李華明同Emily講，今次嘅目標係200萬。佢話好有信心達標，因為除咗晚宴席券賣得好理想，仲有重量級拍賣品，好似前政務司長唐英年捐咗13支名酒出嚟，總估價最少20萬。


無請特首中聯辦

政務司長林鄭月娥同財政司長曾俊華都唔去食飯，但會出席晚宴前酒會。民主黨今次無請特首梁振英同中聯辦官員，李華明話中委員商議後，決定唔邀請曾經被民主黨動議下台嘅問責官員，希望可以互相尊重同避免尷尬咁話。不過，佢哋就唔怕被人有口實批評，有請到各國總領事，包括美國駐港總領事夏千福。除咗兩個司長會出席酒會外，環境局長黃錦星都會偕副局長同政助出席，連商務及經濟發展局前局長馬時亨都會去，認真畀面呀。當晚會設宴50圍至55圍。


李華明話晚宴有佢同岑建勳做「拍賣官」，當晚唔止有唐唐捐嘅紅酒，仲有前運房局長鄭汝樺捐出嘅墨寶《五燈會元—卷五》，同前黨主席何俊仁忍痛割愛捐出嘅「萬荷堂主」黃永玉畫作《花鳥》。有咁多重量級拍賣品，難怪李華明笑得咁開心。