盧偉國吹笛拉琴都拿手

【明報專訊】立法會工程界議員盧偉國（David）早前喺專資會吹奏色士風技驚四座。但原來David識吹色士風之外，仲識吹笛子、玩秦琴、二胡、琵琶、粵曲、古琴、唱南音等。David透露，佢善記曲調，所以學起樂器得心應手，仲話細細個聽到哥哥姐姐喺天台吹口琴，自此同樂器結緣，但玩咗咁多年樂器，到家從無參加音樂評級考試。


天台聽口琴聲結緣

David話，父母喺1950年代從大陸來港，當時住喺九龍城福佬村道唐樓板間房，「居住環境非常擠迫」。佢話，當時嘅小朋友有無窮嘅玩意，跳橡筋繩、跳飛機、彈波子都有人玩。但自從儲夠零用錢買咗第一個口琴同口琴教學書後，就忍唔住繼續學落去。


唔講唔知，原來David太太係女高音，佢哋嘅仔係男高音，David最細嘅細佬亦係音樂人。唔知David又有無興趣同政壇歌手、平機會主席周一嶽jam歌？