梁繼昌扮酷有苦衷

【明報專訊】會計界立法會議員梁繼昌（Kenneth），噚日喺facebook上載咗張戴住副黑超嘅有型相片，但佢話唔係要扮電視劇《衝上雲霄II》嘅機師Captain Cool，其實佢噚日右眼做咗視網膜修補手術，要喺屋企休息半日，所以戴超護眼啫。


Kenneth話，佢右眼近視700幾度、左眼300幾度，成日睇文件同埋睇電腦，雙眼唔係幾好。上個禮拜去睇醫生，醫生話佢右眼視網膜有啲破損，建議佢做激光修補，費事惡化搞到有脫落風險，所以佢趁暑假工作量少啲嘅日子去咗做手術。佢話做手術時有啲痛，但唞一日就得，今日就會復工做嘢。


近視雖然幾深，但Kenneth話無諗過做激光矯視，認為就算做咗矯視，將來可能都要戴番「老花眼鏡」，既然如此，倒不如家戴眼鏡算。