港航捐300萬機艙品助弱勢

【明報專訊】晚晚睇電視見到啲機師空姐，令人都想飛番轉，就算冇得飛，用吓機上物資過過癮都好。香港航空近期好積極，除咗冠名贊助劇集，早前仲捐咗價值300萬元嘅舊款機用品畀慈善機構，包括全新嘅客艙毛氈、靠枕、餐具等。接收物資嘅慈善機構包括香港明愛、十字路會、東華三院等，主要幫助香港同其他地方嘅弱勢社群。


空中籌12萬畀殘奧會

香港航空話咁做係想承擔企業社會責任，仲話今次捐生活用品，係因為可以幫弱勢社群，Emily聽落又覺得用意幾好。佢哋仲話，香港航空由上年8月至今年6月喺機上向旅客募捐，籌到12萬蚊，已經捐晒畀香港殘疾人奧委會暨傷殘人士體育協會。