鄧甘滿無悔投身警隊

【明報專訊】官至副警務處長嘅鄧甘滿下周二退休前休假，佢細個時曾經親身經歷警察向老竇收買路錢，因此對警隊起初印象唔好。佢喺倫敦大學畢業後，攞獎學金去澳洲讀免疫學博士，「曾諗過自己會得諾貝爾獎」，不過佢當時獲警隊取錄，幾經掙扎，毅然放棄獎學金，投身警隊至今近34年，鄧sir話無悔當年嘅決定。


下周二退休前休假

鄧sir細個住新界，屋企係養豬嘅，佢經常陪老竇開車去九龍嘅屠房賣豬，親歷警察設路障收買路錢，所以一度對加入警隊有猶豫。佢1979年大學畢業，等候獎學金結果期間，陪友人投考督察，結果自己都獲取錄。與此同時獎學金亦批出，佢幾經掙扎後決定延遲領獎學金一年，想先睇吓做警察喺咪適合，結果做咗幾個月覺得適合，放棄升學。


同太太遊北歐

至於退休後有乜打算，鄧sir話從商「not my cup of tea（不是我杯茶）」，又話自己唔係政治人才，退休後會稍作休息，先同現職高級警司嘅太太李雅麗遊北歐，日後會多啲行山。講到行山，鄧sir難忘2001年去西藏拉薩旅行，登上海拔5200米的珠峰大本營時，因為無空置營地，要「獻出第一次」到寺廟同喇嘛同睡，至今難忘喇嘛身上嘅羊膻味。