商會領袖認聽慣粗口

【明報專訊】小學教師林慧思一句粗口引發爭議，前日更令旺角行人專用區變成粗口戰場，近3000人對峙，癱瘓行人專用區，商舖都要落閘避一避。對呢件事，似乎社會都好兩極化，至於商界領袖又點睇呢？工業總會主席劉展灝話，前日喺旺角發生嘅事會影響營商環境，至少附近商舖就要落閘。不過，佢話其實每日行街都聽到唔少粗口，大家唔使對講粗口咁緊張咁話。


認會影響營商環境

劉展灝話，佢都唔希望見到香港發生衝突，無論係乜嘢題目，大家都可以理性討論，因為香港有言論自由。佢覺得， 一般市民平日去食肆、坐車都好，容易聽到人講粗口，大家唔需要太緊張。就算有乜嘢想討論，其實都唔應該引起對商業區嘅影響。


至於中華總商會會長楊釗就話，「咁大個仔無講過粗口，就係假嘅」，佢相信，社會上從來無講過粗口嘅人真係好少。但佢覺得，即使要講，都要注意乜嘢場合，無論如何，對人都要有基本尊重，老師當然唔應該講粗口。至於老師都已道歉，係咪仲應該咁樣「批鬥」，楊釗就話家事件已經太複雜，扯到好遠，太政治化喇。


中聯辦副主任殷曉靜噚日亦有被問點睇旺角混亂呢件事，究竟係咪香港病了，佢就簡單回應話「不是」。