容樂其遭免社民連行委

【明報專訊】社民連又搞分裂？Emily前幾日睇社民連網頁，發現有特別消息，話容樂其（Rocky）被免除行政委員職務。Emily八卦得知，原來係因為碼頭工人罷工嗰陣，珠海書院新聞系一年級學生辛兒璁（辛辛）參加大專苦行帶斜孭袋，上圍身材被人評頭品足，Rocky就喺facebook轉貼一段YouTube片《愛美神飛彈》，惹嚟網民群起攻之，有人向社民連投訴。


被指缺席紀律小組答辯

聽講Rocky一直無認錯，件事交畀紀律小組調查，但係佢唔多合作，叫咗佢幾次都係話「咁小嘢」唔出席答辯，態度好差，所以紀律小組就向行委會決定免除佢職務，不過仲保留黨員身分。Rocky話唔接受訪問，辛辛家就外遊，Emily希望件事告一段落啦。話時話，社民連行委會下年2月改選，主席一職應該都係由「長毛」梁國雄連任。