大元邨搞祈福法事

【明報專訊】區議員及屋邨互委會通常會搞吓旅行團、蛇宴等活動，但大埔大元邨嘅鄭俊平議員同埋居民，就會喺8月2日（周五）搞大型祈福法事，原來屋邨近5年已經有約10宗墮樓案，單係泰樂樓就佔咗4單，所以街坊都想搞啲活動，好讓邨民出入平安，安心一啲。


互委會今次請咗圓玄學院一班道士返嚟，朝九晚五咁喺廣場搭台讀經燒香，超度死者，亦為生者祈福。邨內嘅人話剛喺今年6月先有一單墮樓事件，而近年嘅個案，墮樓者有邨民，亦有外來者走嚟屋邨尋死。


街坊添香油 主辦包底

鄭俊平話大元邨算係老邨，有唔少長者居民，可能因此有多啲墮樓事件。呢場法事預計要用5萬至6萬蚊，屆時會由邨民添香油錢，餘下金額就由主辦單位包底。佢話搞法事主要係由居民提出，如果能令居民安心啲，搞吓呢類宗教儀式都無妨。