財爺憶同門劉家良傷感

【明報專訊】武打電影導演劉家良師傅去世，跟劉家良屬同門嘅財爺曾俊華，噚日喺網誌撰文憶師伯。二人輩分唔同，但同屬洪門弟子，財爺嘅師父鄺鐵夫，與劉家良同為林世榮嘅徒孫，係同輩，大家都算係黃飛鴻傳人。對於呢位良師益友去世，曾俊華就慨嘆人生無常，心情難過。


聽練拳心得係樂事

劉家良嘅喪禮7月23日喺世界殯儀館設靈，翌日出殯，據知財爺會盡量抽空送別。財爺話認識劉師傅多年，每次聽佢分享練拳心得同拍電影嘅軼事，都係賞心樂事。佢話印象中，劉師傅係一個「舊派」人物，即使時代轉變，仍忠於自己嘅傳統作風﹕重義氣，講信用，尊師重道，飲水思源。


財爺又借題發揮，話除咗電影界，喺其他傳統行業好似教育、製造、飲食、創意文化、音樂、建築等等，香港都有一班默默耕耘嘅匠人，守衛各自範疇嘅優良傳統。佢仲話家啲學生鍾意「分散投資」，練劍、游水、彈琴、朗誦、辯論，仲未計課後嘅補習班。財爺話年輕人有咁多選擇，當然唔係希望有朝一日參加運動會嘅「十項全能」，而係好多時候只係想有一張亮麗嘅CV。