《與陶傑同牀》才子自我審查

【明報專訊】才子陶傑有唔少fans，上年書展聽聞平時寫開散文嘅佢會出一本小說集叫《與陶傑同牀》，令粉絲好期待。點知上年書展無，出面書局又無，到今年書展終於有得賣。Emily買咗本嚟睇，原來係一本短篇情色小說集，分8個短篇故事講男女關係，有啲用字都幾露骨，但感情描寫幾細緻，仲發現原來本書上年7月已經印好，但今年先開賣，唔通好似本《香港簡史》咁畀人「河蟹」咗？


連載惹批評 一年後先出

陶傑笑笑口話畀Emily聽係佢「自我審查」，聽到Emily一頭霧水。查實陶傑前年喺《爽報》創刊時寫咗兩個月情色小說連載，仲自己配埋音，引來唔少批評，搞到陶傑舊年想出本結集時都要hold一hold，等啲批評聲音淡忘咗再出，唔知今年明光社會唔會叫《與陶傑同牀》笠下膠套先好賣呢？