項明生新書會 維基撐場 品儒甩底

【明報專訊】噚日香港電視主席王維基出席旅遊作家項明生新書《足足五萬年》嘅簽名會。見到王維基，自然就會問佢發牌有咩新進展。佢就話，最近無任何進展，叫大家應該問返政府。佢透露，香港電視已經拍咗超過200個小時節目，今個月籌備緊拍新劇，為爭取發牌做好準備。佢已經計劃好暑假去外地潛水，放鬆心情，仲笑住話，自己有好多個潛水牌，但係就偏偏少咗個免費電視牌。佢話，發牌之後一定會叫項明生幫佢拍返輯旅遊節目。


贈言品儒：君子一言

亞洲電視執行董事盛品儒都應承咗會到場，前晚突然話星期日先返到香港，臨時甩底。項明生話盛品儒知道佢會出新書，就即刻話要嚟撐場。當時項明生同盛品儒講定請咗咩嘉賓，佢回覆話唔介意同王維基同場，但點知最後都係甩底，項明生最後無奈贈咗「君子一言，駟馬難追」畀盛品儒。