明哥「大愛」新書 林鄭第一個收

【明報專訊】好多團體都趁書展出書，宣傳又好籌款又好，今年先成立嘅「大愛同盟」都唔例外，出咗一本《大愛同誌》，今日面世。不過大愛同盟創始成員黃耀明噚日已經「偷步」送咗一本畀政務司長林鄭月娥，佢趁司長參加完劉培基個人作品展開幕禮走嗰陣時直接送咗畀佢，林鄭收到時仲笑笑口問係咪講同志㗎！明哥話司長係第一個攞到本書嘅人喎。


林鄭笑問：係咪講同志？

香港文化博物館舉行劉培基個人作品展「他 Fashion 傳奇 Eddie Lau 她 Image 百變 劉培基」，噚日舉行開幕禮，林鄭月娥話文憑試啱啱放榜，希望考得唔好嘅學生可以由劉培基嘅經歷受到啟發，千祈唔好迷惘。劉培基11歲就入行做裁縫學徒，後來成為香港著名設計師，佢話成功秘訣係堅持，自己都喺呢行堅持咗50年，希望大家嚟睇展覽時可以體會到香港精神，特別係年輕人要努力做好每件事。


以劉培基經歷勉考生

今次展覽喺沙田嘅香港文化博物館舉行，展出近70件劉培基作品，其中有超過20套係幫梅艷芳設計嘅舞台服，展期今日至明年1月13日。